Elbasy kitaphanasy Mýzeıiniń ǵımaratynda sýretshi Muratbek Jolamanovtyń (1966–2000) «Rýhpen syrlasý» kórmesi ashyldy. Kórme Elbasynyń «Rýhanı jańǵyrý» baǵdarlamasynyń aıasynda uıymdastyryldy.
Elbasy kitaphanasy dırektorynyń orynbasary Ámirhan Rahymjanov óziniń alǵy sózinde:
– Sýretshiniń kórmege qoıylǵan 30-dan astam jumysy tereń mazmunymen jáne jarqyndyǵymen erekshelenedi. Biregeı týyndylardyń mazmuny Elbasynyń «Rýhanı jańǵyrý» baǵdarlamasynyń negizgi baǵyt-baǵdarymen úndes. Avtordyń qaı shyǵarmasyn alyp qarasaq ta, tarıhı taqyryptar men aqyndardyń kóńil kúmbirine boılaı qalam tartqan ǵajaıyp týyndylarda bizdiń ulttyq biregeıligimiz, týǵan elge degen shynaıy patrıottyq sezimderimiz aıshyqtala túsken. Muratbek Jolamanov jaryq juldyzdaı otandyq beıneleý óneriniń shyńyna izin qaldyrdy. Bul ǵasyrlar toǵysyndaǵy Qazaqstannyń kórkem óneriniń erekshe bir qubylysy ekeni daýsyz. HH ǵasyrdyń 90-jyldarynyń sońynda qylqalam sheberi dáýir beınesine aınalǵan obrazdardy dúnıege ákeldi, – dedi.
Sýretshiniń jubaıy Gúljámish Jolamanova onyń erekshe talantyna toqtaldy:
– Muratbektiń týyndylarynyń negizgi taqyryptary – qazaq halqynyń tarıhy. Onyń armany – týǵan eliniń, halqynyń san qyrly ári ǵajaıyp tarıhyn kartına arqyly jetkizý edi. Ata-babadan qalǵan mol rýhanı qazynany keler urpaqqa qasterlep qaldyrýdy oılady. Ol ejelgi tarıhymyzdy tereńnen zerdelep, sodan soń ǵana kartına salý jumysyna kirisetin. Muqań óz eliniń naǵyz patrıoty. Qazir biz rýhanı jańǵyrý týraly kóp aıtyp júrmiz. Onyń kartınalary tarıhtyń tereńine boılap, rýhqa taǵzym etýdiń jarqyn mysaly. Muratbektiń kórkemdik sheberligi – óz aldyna bólek áńgime. Aramyzdan ketkenine 18 jyl bolsa da, onyń shyǵarmashylyǵy búgingi jastarǵa qyzyqty ári óner súıer qaýym arasynda ózektiligin joıǵan joq. Kartına jazý máneri men tehnıkasy óz zamanynan ozyq boldy. Ol eshqashan tapsyryspen jumys jasamaıtyn, tek sharyqtaǵan shabyty ǵana keremet týyndylardy dúnıege ákelýge sebepshi boldy.
Kórmeniń ashylý rásimine QR Parlamenti Májilisiniń depýtattary, memleket jáne qoǵam qaıratkerleri, Qazaqstannyń Sýretshiler odaǵynyń músheleri qatysty.
QR eńbek sińirgen qaıratkeri, Qazaqstannyń Sýretshiler odaǵynyń múshesi, Halyqaralyq kásibı sýretshiler odaǵynyń múshesi (Brıýssel), Nankın kórkemsýret ýnıversıtetiniń qurmetti professory (QHR), «Kavaler ıskýsstva» Altyn ordeniniń ıegeri Sembiǵalı Smaǵulov óziniń shákirti M. Jolamanovtyń tulǵalyq qasıetteri týraly aıtyp berdi:
– Muratbek Jolamanovtyń qysqa, biraq óte jaryq ǵumyry shyǵarmashylyq izdenister men bastamalarǵa toly boldy. Ol ózin túrli janrlarda baıqap kórdi. О́z basym jas sýretshilerdiń osy qasıetterin joǵary baǵalaımyn. Muratbekti Jánibek pen Kereı handar, Mahambet, Syrym batyrlar syndy uly tarıhı tulǵalar qyzyqtyratyn. Shyǵarmashylyq samǵaýynyń erte úzilgeni ókinishti, alaıda Muratbek artyna mol shyǵarmashylyq mura qaldyrdy. Onyń ómiri búgingi óskeleń urpaq úshin óz otanyna qaltqysyz qyzmet etýdiń jarqyn mysaly bolary sózsiz.
M.T. Jolamanov Batys Qazaqstan oblysynyń Josaly aýylynda dúnıege kelgen. 1990 jyly O. Tańsyqbaev atyndaǵy kórkemsýret kolledjiniń «Keskindeme» bólimin, al 1996 jyly T. Júrgenov atyndaǵy Qazaq ulttyq óner akademııasyn bitirgen. Sýretshi akademık K. Teljanov pen professor M. Qalymovtan bilim alǵan. Oqý úzdigi retinde Muratbek Taýfıkulyn T. Júrgenov atyndaǵy Qazaq ulttyq óner akademııasynda, «Akademııalyq keskindeme» kafedrasynda sabaq berýge qaldyrady. Osy jyldar aralyǵynda sýretshi kóptegen respýblıkalyq jáne halyqaralyq kórmelerge de qatysty. Qazirgi kezde sheberdiń jumystary Túrkııa, Polsha, Anglııa, Koreıa syndy elderdiń mýzeılik jáne jeke qorlarynda saqtaýly.
Muratbek Jolamanov kartınalarynyń sıýjeti men beıneleri qarqyndy ózgeristegi álemde, ózindik jańǵyrý satysyn bastan keship otyrǵan qoǵamnyń kúndelikti aǵymynda ózekti bola túsken.
Kórmede Qazaqstan halqynyń ulttyq ıgiligi bolyp tabylatyn sýretshiniń 30-dan astam jumysy usynyldy.
Kórme 2018 jyldyń 27 naýryzyna deıin jalǵasady.